พุธ=ญาเณ, พุชฺฌเตติ พุชฺฌิตพฺโพ ธมฺโม พุชฺฌนีโยฯ สุ=สวเน, สูยเตติ โสตพฺโพ ธมฺโม, ญฺญิมฺหิ นาคเม ‘‘ตถนรานํ ฏฐณลา’’ติ เณ จ กเต ‘‘น เต กานุพนฺธ+นาคเมสู’’ติ โอการาภาโวฯ สุณิตพฺโพ, สวนีโยฯ กร=กรเณ –

95. ปรรูป+มยกาเร พฺยญฺชเน

กฺริยตฺถาน+มนฺตพฺยญฺชนสฺส ปรรูปํ โหติ ยการโต อญฺญสฺมิํ พฺยญฺชเนฯ กรียตีติ กตฺตพฺโพ ธมฺโม, กตฺตพฺพา ปูชา, กตฺตพฺพํ กุสลํฯ

119. ตุํ+ตุน+ตพฺเพสุ วา

ตุมาทีสุ กรสฺสา โหติ วาฯ กาตพฺพํ หิตํฯ

171. รา นสฺส โณ

รนฺตโต กฺริยตฺถา ปจฺจยนการสฺส ณ โหติฯ กรณีโยฯ

ภร=ภรเณ, ภรียตีติ ภริตพฺโพ ภรณีโยฯ คห=อุปาทาเน ‘‘มํ วา รุธาทีนํ’’ติ อนฺตสรา ปโรมํ วา โหติฯ มกาโร+นุพนฺโธฯ ‘‘โณ นิคฺคหีตสฺสา’’ติ นิคฺคหีตสฺส โณ, สํคยฺหตีติ สํคณฺหิตพฺโพ สํคณฺหนีโย, ‘‘ตถนรา’’ทินา ณกาเร คหณีโยฯ รม=กีฬายํ, รมียตีติ รมณีโย วิหาโรฯ อาป=ปาปุณเน, ‘‘สกาปานํ กุกกู เณ’’ติ เอตฺถ ‘สกาปานํ กุก+กู’ติ โยควิภาคา กุ, อูอาคเม นาคมสฺส เณ จ กเต ปาปียตีติ ปาปุณิตพฺโพฯ ปรรูเป ปตฺตพฺโพ, ปาปุณนีโย, ปาปนีโยฯ